അൾത്താര ശുശ്രൂഷികളുടെ വസ്ത്രം ധരിച്ച 250 ൽ ഏറെ കുട്ടികൾ… മാലാഖമാരേപ്പോലെ പാട്ടുപാടിയും, പ്രാർത്ഥിച്ചും, സ്തുതിച്ചും ഒത്തുചേർന്ന അനുഗ്രഹീത നിമിഷങ്ങൾ… ബിഷപ്പ് സ്റ്റീഫൻ ചിറപ്പണത്ത് മുഖ്യകാർമ്മികനായ വിശുദ്ധ കുർബാന… കുട്ടികളേയും, അധ്യാപകരേയും മാതാപിതാക്കളേയുംകൊണ്ട് നിറഞ്ഞ ദേവാലയം. ഡബ്ലിൻ സീറോ മലബാർ സഭയുടെ പ്രഥമ സാവിയോ ഫെസ്റ്റ് അവിസ്മരണീയമായി.
ഡബ്ലിൻ സീറൊ മലബാർ സഭയുടെ അഭിമാനമായ്, മാസങ്ങൾ നീണ്ട പരിശീലനത്തിൽ, ഭാഷയുടെ വേലിക്കെട്ടുകൾ മറികടന്ന് 9 കുർബാന സെൻ്ററുകളിലായി മുന്നോറോളം കുട്ടികൾ അൾത്താരശുശ്രൂഷകരായി സേവനം ആരംഭിച്ചുകഴിഞ്ഞു. ദേവാലയ ശുശ്രൂഷകരുടെ മാതൃകയും പ്രചോദനവുമായ വിശുദ്ധ ഡൊമിനിക് സാവിയോയുടെ തിരുനാൾ ദിനമായ മെയ് 6 നു ബ്ലാഞ്ചർഡ്സ്ടൗണിലെ ഹൺസ്ടൗൺ തിരുഹൃദയ ദേവാലയത്തിൽ നടന്ന അൾത്താര ബാലകരുടെ സംഗമം യൂറോപ്പിനായുള്ള സീറോ മലബാർ സഭയുടെ അപ്പസ്തോലിക് വിസിറ്റേറ്റർ മാർ സ്റ്റീഫൻ ചിറപ്പണത്ത് ഉദ്ഘാടനം ചെയ്തു. വിശുദ്ധ ഡൊമിനിക് സാവിയോ, വിശുദ്ധ ജോൺ ബെർക്കുമാൻസ്, വിശുദ്ധ മരിയ ഗൊരേത്തി തുടങ്ങിയ വിശുദ്ധരുടെ വ്യക്തിത്വം നിങ്ങളെ ആകർഷിക്കണം, അത് യേശുവിലേയ്ക്ക് വളരാൻ പ്രചോദനം ആകണം, ബിഷപ്പ് പറഞ്ഞു. നമ്മുടെ യുവ വൈദീകരുടെ തീഷണതനിറഞ്ഞ പ്രവർത്തനം കുട്ടികളിൽ ദൈവവിളികൾ ഉണർത്തുവാൻ കാരണമാകട്ടെയെന്ന് ബിഷപ്പ് ആശംസിച്ചു.
അൾത്താര ശുശ്രൂഷകരെ പ്രത്യേകം സമർപ്പിച്ച് പ്രാർത്ഥിച്ചു. കുട്ടികളുടെ വിവിധങ്ങളായ പരിപാടികൾ അവതരിക്കപ്പെട്ടു. കുട്ടികളേയും അവരെ പരിശീലിപ്പിച്ച അധ്യാപകരേയും സമ്മാനങ്ങൾ നൽകി ആദരിച്ചു.
ശ്രീലങ്കയിൽ ഭീകരാക്രമണത്തിൽ മരിച്ചവർക്കായി പ്രത്യേക പ്രാർത്ഥനയും അനുസ്മരണവും നടന്നു. ഉച്ചഭക്ഷണത്തോടെ സാവിയോ ഫെസ്റ്റ് വിജയകരമായി സമാപിച്ചു.
ചാപ്ലിന്മാരായ റവ. ഡോ. ക്ലമൻ്റ് പാടത്തിപറമ്പിൽ, ഫാ. രാജേഷ് മേച്ചിറാകത്ത്, ഫാ. റോയ് വട്ടകാട്ട് എന്നിവർ പരിപാടികൾക്ക് നേതൃത്വം നൽകി. ഡബ്ലിൻ സോണൽ കമ്മറ്റിയും ബ്ലാഞ്ചർഡ്സ്ടൗൺ കമ്മറ്റിയും ക്രമീകരണങ്ങൾക്ക് നേതൃത്വം നൽകി.
|
